O Concello de Piñor vai poñer en marcha un curso sobre a atención sociosanitaria a persoas no domicilio.

Esta formación de 630 horas que substitúe o anterior “Auxiliar de axuda a domicilio”, posúe certificado de profesionalidade adaptado a Unión Europea, polo que tras realizalo, recíbese unha habilitación profesional para traballar con dependentes. Debido a que se concede un certificado oficial de nivel 2, para cursalo, os alumnos deberán posuír algúns dos seguintes requisitos ou superiores:

• Título E.S.O. ou superior

• Ter superadas as probas de competencias clave en lingua castelá, lingua galega e matemáticas.

• Ter un certificado de profesionalidade de nivel 2.

• Ter un certificado de profesionalidade de nivel 1 da mesma familia e área profesional.

• Título de técnico auxiliar.

• Título de técnico.

• Ter superado o segundo curso de B.U.P.

• Ter superado o segundo curso do primeiro ciclo experimental da reforma das ensinanzas medias.

• Ter superado as ensinanzas de artes Aplicadas e Oficios Artísticos, terceiro curso do plan de 1963 ou segundo de comúns experimental.

• Ter superado outros cursos declarados equivalentes a efectos académicos con algún dos anteriores.

• Ter superado as correspondentes probas de acceso aos ciclos formativos de grao medio.

• Ter superado a proba de acceso á universidade para maiores de 25 anos.

Ademais é preciso posuír  o certificado de lingua galega 3 (Celga 3) ou as seguintes  validacións:

• Certificado de aptitude dos cursos de iniciación de lingua galega (segundo orde do 1 de abril de 2005).

• O título de graduado en educación secundaria obrigatoria (E.S.O) ou técnico auxiliar (FP1), sempre que se estudase en Galicia na súa totalidade e se cursase de maneira oficial a materia de lingua galega en todos os cursos dos ditos estudos.

• O certificado do ciclo inicial de galego expedido polas escolas oficiais de idiomas.

• Certificados de ter cursado e aprobado as materias de ciencias sociais e as materias optativas de galego na E.S.O e no bacharelato nos centros do Bierzo e Sanabria acollidos ao programa de formación previsto no convenio para a promoción do idioma galego nos territorios limítrofes das comunidades autónomas de Galicia e León, subscrito entre ambas as dúas comunidades.

O curso ten previsto o seu inicio en xuño e o seu remate en novembro. Consta de catro módulos formativos:

• Hixiene e atención sanitaria domiciliaria (170 horas): necesidades dos dependentes, administración de alimentos e tratamentos...

• Atención e apoio psicosocial domiciliario (210 horas): apoio a xestións das persoas dependentes e a súa comunicación co medio...

• Apoio domiciliario e alimentación familiar (100 horas): aprovisionamento, mantemento e organización do domicilio do dependente...

• Módulo de prácticas profesionais obrigatorias (120 horas).

Ademais dentro da programación inclúense 32 horas de prácticas voluntarias.

Aquelas persoas interesadas en realizar dito curso deberanse dirixir o Concello de Piñor (servizo de orientación laboral) ou chamar o teléfono do concello 988 403 236.