Turismo

Turismo | Camiño de Santiago

Camiño de Santiago

O Camiño de Santiago foi e segue sendo a ruta máis antiga, máis concorrida e máis celebrada do vello continente.

Santiago non solo foi un polo de atracción para peregrinos e viaxeiros durante séculos, senón que ademais creou unha ruta propia, fixo un Camiño.

Os elementos culturais e paisaxísticos e o propio contacto con pobos e costumes configuraron o que o Consello de Europa declarou como “Primeiro Itinerario Cultural Europeo”, facendo desta vella ruta unha vía tamén de arte e cultura, un Camiño de espiritualidade, ata o corazón de Galicia.

A Santiago e a Galicia pódese chegar de moitas maneiras, pero sen dúbida, a mellor de elas é o CAMIÑO DE SANTIAGO.

¡PONTE A ANDAR E COÑECE O NOSO TERRITORIO!

“Vía da Prata” - Camiño do Sueste.

A Vía da Prata é o camiño xacobeo galego de maior percorrido.

Procede de Sevilla, Mérida, Zamora, e entra en Galicia pola provincia de Ourense.

Coñecido como “Camiño Mozárabe”, “Camiño meridional”, “Camiño do Sueste” e prolongación da Vía da Prata, sen dúbida este é un dos Camiños de Santiago, de maior beleza tanto paisaxística como artística; ademais da súa importancia histórica como ruta comercial.

Para máis información www.xacobeo.es

TRAMO DE San Cristovo de Cea- PIÑOR- Dozón.

(Extensión aproximada: 14 km)

O concello de Piñor é un fermoso e descoñecido municipio do interior ourensán.

Situado na comarca do Carballiño, Piñor esconde numerosas e belas paisaxes que nos adentran nun gran pasado cargado de esplendor e nun esperanzador futuro.

Piñor está atravesado por un antigo ramal do Camiño de Santiago, que posibilitou a construcción de pequenas igrexas con fermosas rectorais, entre as que destacan a de San Xoán de Barrán e a igrexa de San Paio de Loeda.

Guía do peregrino

Desde San Cristovo de Cea, debes continuar o Camiño en dirección Porto do Souto, pasando logo por pequenas aldeas do municipio de Piñor: Cotelas, A Mirela, Piñor, Arenteiro, A Ponte, O Reino, Carballeda, O Desterro e Sobrado ata chegar a O Castro de Dozón, situado xa, na provincia de Pontevedra.

A pesar de que existe una derivación deste Camiño, que vai desde San Cristovo de Cea a Dozón, pasando por Oseira e logo retomando o Camiño a Dozón por, Carballediña (Piñor) e Coiras (Piñor), o Camiño primitivo é o citado anteriormente.

Por outro lado, a beleza paisaxística é incomparable, observándose especies arbóreas autóctonas que chaman a atención pola súa grandiosidade e especial fermosura, así como estampas á veira dos ríos Arenteiro e Mirela dignas de ser observadas, e diversas mostras de patrimonio etnográfico e artístico, que deixan entrever a cultura tradicional do territorio de Piñor (hórreos dos máis variopintos estilos, casas de arquitectura tradicional galega, fermosas pontes medievais, capelas, rectorais, históricas igrexas...).

Onde descansar e retomar forzas:

A continuación facilitámosche información útil sobre os lugares públicos e establecementos privados de Piñor, onde podes retomar forzas e incluso descansar.

Fontes, prazas e áreas recreativas.

Fonte da Mirela.

Área recreativa da Mirela, xunto ó río Mirela. Dispón de papeleiras, fonte e mesas con bancos. Esta pequena área recreativa invita ó relax nun lugar de gran beleza paisaxística e cas cascadas e o fluír do río Mirela como son de fondo.