Os antigos camiños, calzadas e vías pecuarias, que serviron ó longo dos séculos para desprazarse, son un rico patrimonio histórico que o Concello de Piñor quere conservar.

O sendeirismo é un bo modo de manter e recuperar esa rede viaria que, de lugar en lugar, comunicaba e permitía o paso de comerciantes, de pastores e gandeiros, de pescadores, dos peregrinos de antano e como non, dos nosos queridos antepasados que usaban os camiños locais para moverse dunha aldea a outra.

O poñerse en camiño permitirache descubrir mostras da Historia de Piñor, ó ritmo do teu paso, coñecendo en profundidade a nosa terra, lonxe das aglomeracións urbanas. Sen dúbida, unha gran experiencia para os amantes do deporte ó aire libre e en contacto coa natureza, observando grandes monumentos e mostras descoñecidas da arte e da cultura rural.

A través dos nosos sendeiros, o camiñante poderá gozar de vixilantes cruceiros, cabaceiros, solitarios petos de ánimas, pontes romanas e medievais, igrexas de conto, máxicos Pazos, casas rurais, muíños e outras manifestacións populares en pedra, sempre enmarcados no camiño, cunha rica e ampla variedade de especies botánicas.

Esperamos que goces “tripando” a nosa terra, pero antes, permítenos darche algunhas indicacións:

Recomendacións útiles para ti, sendeirista:

- Levar calzado cómodo e flexible, preferiblemente botas de montaña.

- Levar roupa adecuada. Sempre é recomendable levar pantalóns largos.

- Hidratarse a miúdo, bebendo auga.

- Protexer a pel e os ollos con protección solar e gafas de sol.

Recomendacións ó teu paso pola natureza:

- Non arrancar, cortar ou deteriorar a vexetación.

- Recordar que a colección de setas esixe coñecer e respectar certo protocolo.

- Non esquecer que no monte un débese comportar como un invitado en casa allea, respecta a flora, a fauna e o patrimonio etnográfico.

- Non arroxar lixo e se o atopas, por favor recólleo e deposítao nos lugares acondicionados para tal fin. ¡Colabora na limpeza dos espacios naturais!

- Non alterar a tranquilidade natural con ruídos, altavoces ou luces innecesarias.

- Non tirar colillas de cigarros prendidas ou apagadas, xa que poden provocar incendios.

- Seguir os camiños sinalados. Evitando pisar os campos con plantacións.

RUTA DE SENDEIRISMO “RÍO ARENTEIRO”

• Lonxitude: 15 km.
• Inicio/Fin: Arenteiro.
• Dificultade: Media.
• Descrición: Esta ruta é circular, rematando no mesmo punto onde empeza. A mellor opción é empezar desde Arenteiro ou desde Piñor, en ámbolos puntos, encontrarás un panel informativo da ruta.
  Boa parte do percorrido transcorre baixo arborado, atravesando carballeiras e piñeirais. Os tramos cércanos ós ríos presentan abundante vexetación de ribeira con bidueiros, freixos, ameneiros, etc. e un valioso sotobosque. O sendeirista poderá gozar duns sendeiros cheos de encanto e tranquilidade. Ademais, ó longo dos 15 km. poderá observar parte do rico patrimonio etnográfico e histórico - artístico de Piñor (cabaceiros, muíños, capelas, pontes, etc.), mostra do seu importante pasado.
• Núcleos de poboación polos que pasarás: No caso de que elixas Piñor como punto de partida pasarás por Piñor, A Albarona, Lousado, Arenteiro, Arenteiriño, Casarellos, Córneas, Pereira, Cales, Casmoniño, Barrán e volta a Piñor.
• Descargar o plano da ruta

RUTA DE SENDEIRISMO “RÍO SILVABOA”

• Lonxitude: 9 km.
• Dificultade: Media.
• Núcleos de poboación: Freás, Cotelas e Casfigueiro.
• Descrición da ruta: Esta ruta chamada “Ruta do río Silvaboa” pasa por aldeas da parroquia da Canda, seguindo en todo momento, o fluír do río Silvaboa.
  A ruta poderíase clasificar como lineal e aínda que se podería facer a través dunha sola beira do río, recomendámosche facer a ruta en forma circular, pasando por ámbalas marxes do río Silvaboa, xa que en cada unha delas descubrirás construccións e paisaxes únicas, dignas de ser vistas.
  Pasarás por antigas pontes de pedra de gran interese histórico-artístico; soñarás á beira de numerosos e antigos muíños, que aínda que hoxe permanecen pasivos e en silencio, deixan entrever a súa actividade e esplendor pasado; camiñarás a carón dunha das primeiras mini-centrais eléctricas da comarca, construída polos veciños do lugar de Freás alá por 1945; observarás impoñentes Pazos, cheos de historia; e sobre todo gozarás de fermosas paisaxes, que invitan ó turista a internarse na nosa historia e na frondosidade das nosas verdes terras.
• Guía do sendeirista
  Punto 1(Inicio): Piscinas de Freás
  Punto 2: Muíños
  Punto 3: Antiga ponte de Cotelas, área recreativa.
  Punto 4: Antiga zona de baño “O Cántaro”.
  Punto 5: Terreos e construccións do Pazo de Vilariño.
  Punto 6: Ponte da antiga N-525
• Descargar o plano da ruta